रक्षा खडसेंच्या मुलीची छेडछाड – मुख्यमंत्र्यांनी थेट सुनावले, आरोपींचे राजकीय कनेक्शन उघड?

NewsZenn Mar 3, 2025 269 0

राज्यभर महिलांच्या सुरक्षेचा मुद्दा ऐरणीवर आला असताना, आता केंद्रीय राज्यमंत्री रक्षा खडसेंच्या मुलीची छेडछाड झाल्याची धक्कादायक घटना समोर आली आहे. मुक्ताईनगर कोथळी गावात यात्रा सुरू असताना काही टवाळखोरांनी हा प्रकार केल्याने मोठी खळबळ उडाली आहे. यामुळे ‘जर एका केंद्रीय मंत्र्याच्या मुलीची सुरक्षितता धोक्यात असेल, तर सामान्य महिलांचे काय?’ असा प्रश्न उपस्थित झाला आहे.

या घटनेनंतर राज्यातील राजकीय वातावरण तापले आहे. मुख्यमंत्री देवेंद्र फडणवीस यांनी यावर कठोर प्रतिक्रिया देत आरोपींना कोणतीही माफी नाही, असे स्पष्ट केले आहे. विशेष म्हणजे, ज्या पक्षाशी संबंधित आरोपी आहेत, त्यावरही त्यांनी गंभीर टिप्पणी केली.

मुख्यमंत्र्यांनी घेतली कठोर भूमिका
मुख्यमंत्री देवेंद्र फडणवीस यांनी या घटनेबाबत रोखठोक भूमिका घेत, “या प्रकरणात एका विशिष्ट राजकीय पक्षाचे पदाधिकारी सामील आहेत. आरोपींना माफ करणे शक्य नाही. त्यांच्यावर कठोर कारवाई होणारच,” असे स्पष्ट शब्दांत सांगितले. विशेष म्हणजे, हे वक्तव्य त्यांनी उपमुख्यमंत्री एकनाथ शिंदे यांच्यासमोरच केले.

दरम्यान, जळगाव प्रकरणातील आरोपी हे शिवसेना शिंदे गटाचे आमदार चंद्रकांत पाटील यांच्या कार्यकर्त्यांशी संबंधित असल्याची चर्चा आहे. त्यामुळे मुख्यमंत्र्यांनी ‘विशिष्ट पक्षाचे पदाधिकारी’ असा उल्लेख केल्याने राजकीय तणाव वाढण्याची शक्यता आहे.

एकनाथ खडसेंनीही केली टीका
या घटनेबाबत बोलताना माजी मंत्री एकनाथ खडसे यांनी थेट सरकारवरच टीका केली आहे. “या आरोपींना राजकीय अभय मिळाले आहे. मागील सरकारच्या काळातही अशीच घटना घडली होती. त्यावेळी देखील आम्ही तक्रार दिली होती, परंतु आरोपींना तातडीने सोडण्याचे आदेश दिले गेले होते. हे गंभीर आहे,” असे खडसे यांनी स्पष्ट केले.

घटनेचा तपशील
मुक्ताईनगर येथे सध्या यात्रा महोत्सव सुरू आहे. या यात्रेदरम्यान केंद्रीय मंत्री रक्षा खडसेंची मुलगी तिच्या काही मैत्रिणींसह सहभागी झाली होती. यादरम्यान काही टवाळखोरांनी तिची छेड काढण्यास सुरुवात केली. सुरक्षारक्षकांनी त्यांना रोखण्याचा प्रयत्न केला, पण आरोपींनी त्यांच्याकडे दुर्लक्ष केले आणि अपमानास्पद शेरेबाजी करत राहिले. इतकेच नाही, तर या तरुणींना धक्काबुक्की करण्याचाही प्रयत्न करण्यात आला.

यामुळे सुरक्षारक्षक तातडीने पोलीस ठाण्यात गेले आणि तक्रार दाखल केली. काही वेळातच भाजपचे वरिष्ठ नेतेही तिथे पोहोचले आणि त्यांनी पोलिसांची चांगलीच कानउघडणी केली. पोलिसांना त्वरित कारवाईचे निर्देश देण्यात आले आणि काही तासांतच आरोपींना अटक करण्यात आली.